நிலவென

கவிதையின்  வருகைக்காக
காத்திருந்த இருள் சூழ்ந்த பொழுதொன்றில்
நிலவென வந்தாய் .

பிரியங்களுக்காக

கண்விழிக்காமல் காற்றில்
முலை தேடும் பிள்ளையை
என்ன சொல்லி தேற்றுவது ?

சீத்தாப்பழம் கொறிக்கும் அணில்களை
வேப்பம்பழம் கொத்தும் காக்கைகளை
புல்மேயும் பசுக்களை
பால்குடிக்கும் பூனைகளை
மீன்முள்   கடிக்கும் நாய்களை  யெல்லாம் கட்டி
எத்தனை நாட்களை கடத்துவது  ?

எங்கு தேடியும் கிடைக்கவில்லை
எங்களுக்கான ஆறுதல்

யுகங்களென கழியும் நாட்களை தவிர்த்து
வாசல் கதவிற்குப்பின்னால்
காத்துக்கிடக்கிறோம்
உனது காலடி ஓசையில்
உதிரும் பிரியங்களுக்காக .

பதைபதைக்கும் பிரிவின் கணங்கள்

எப்படி எதிர்கொள்வதென்று  தெரியவில்லை?
எப்படி ஏற்றுக்கொள்ளப் போகிறேன் என்று புரியவில்லை ?
எப்படியிருக்கும்  நீ பிரியும் அந்த கணம் ?

நீ தரப்போகும் அந்த முத்தத்தை
எப்படி ஏற்றுக்கொள்வது?

கால் பெருவிரலில் சிந்தும்
கண்ணீர் துளியை என்ன செய்வது ?

உன் கையசைப்புக்கு
நான் என்ன பதில் சொல்லப் போகிறேன் ?

ஏற்கவும் நிராகரிக்கவும்
முடியாமல் தவிக்கும் என்னை
எப்படி எதிர்கொள்வாய்?

மலையை கடக்கும் புளுவென
அந்தக் கணத்தை நோக்கியே நகரும் காலத்தை
நிதானிக்கவே முடியவில்லை

இப்போது
என்னை குழந்தையாக மாற்றும்
ஒரு புத்தகமொன்றிற்குள் ஒளிந்து கொள்ளப்போகிறேன்






  

நடுச்சாமத் தீராப்பசி

கனன்று மினுமினுக்கும்  கண்களுடன்
புலியின் தோரணையுடன்
பளபளக்கும்   தரையில்
மகரந்தங்கள் படிவதையொத்த நடையுடன்
பால்தேடி அலைகின்றன
பூனைகள் .

-நகுலன் (வாக்குமூலம்)

என் "எழுத்துக்கள்" தான் என்னை ஒரு நிலையில் வைத்திருக்கின்றன.
ஒவ்வருவரைப் பார்கையில், ஒவ்வொரு அனுபவம் என்னை பாதிக்கையில் நான் அவர்களின் அவைகளின் நிழல்கள் ஆகி விடுகிறேன் .நான் 'ஏதோ ஒன்றின்' நிழலாக இயங்கி வருவதால் தான் என் ஜென்மமே சாபல்யமடைகிறது என்று இடைவிடாமல் என்
உள்ளில் ஒன்று ஆடிக்கொண்டிருக்கிறது.எனக்கே நான் என்ன எழுதுகிறேன் என்று தெரியவில்லை.அனால் வேறொன்றின் மூலம் தான் நான் இயங்குகிறேன் என்ற ஒரு உணர்வும் கூடவே என்னைச் சூழ்ந்து கொண்டிருக்கிறது.

எவ்வளவோ பார்த்தாகி விட்டது எனக்குத் தூக்கம் வருகிறது.இந்த உறக்கத்தில் இனி கனவுகள் இல்லை. இந்த உறக்கம் கலைவதையும் நான் விரும்பவில்லை.

-நகுலன் (வாக்குமூலம்)  

நிச்சயம் வெளியேறி விடுவேன்

பக்கம் எண் 25 - 27 ஒட்டியிருந்தது 

புகழ் பெற்ற அறுவைசிகிச்சை நிபுணன் ஒருவனின் 

கத்தரிக்கோலால்   

 

அவனின் 

புத்திகூர்மையோடும் 

உற்சாகத்தோடும்

பரவசத்தொடும் 

கனிவோடும்

நம்பிக்கையோடும்

கத்தரித்தேன்

சிவப்புப் புள்ளியோ 

அதன் வாசனையோ

இல்லவே இல்லை  

"நிச்சயம் வெளியேறி விடுவேன் " என்கிறார் 

சுவர்களுக்குள் 

சுகுமாரன்.      

நிபந்தனை

உண்ண உணவு
உடுக்க உடை
உறங்க இடம்

கிடைக்கிறது

கண்கள் பார்க்கக்கூடாது
காதுகள் கேட்கக்கூடாது
வாய் பேசக்கூடாது
கை எழுதக்கூடாது

என்ற நிபந்தனையோடு

ஆதல்

காது கிடையாது
கேட்க முடியும்

கண்கள் கிடையாது
பார்க்க முடியும்

வாய் கிடையாது
பேச முடியும்

கைகள் கிடையாது
கொடுக்க முடியும்

வேண்டுதல் உண்டு
வழிபாடு  கிடையாது

நானாக
நீயாக
அவனாக
அவளாக
அதுவாக ஆனது
நடுச்சாமத்தில் செய்த கடவுள்

உண்டல்லவே

தெளிவாக தெரியத்துவங்கியது
கட்டங்கள்

அவர்கள்
விட்டுச்சென்ற அதே
நிலையில்

அருவாளோடு
துடியான சாமிவந்தாடும்
பெரிய வெள்ளை மீசைக்காரருக்கு
பதிலாக நீ

மேய்ப்பர் அற்ற
உனது இரைக்குப் பதிலாக
நான்

உனது பாய்ச்சலில்
சிக்கிக்கொள்ளாத
சாதுர்யமான எனது நகர்தல்
ஆச்சர்யமாய் இருக்கிறது

உயிரின் பிரியம் யாவருக்கும்
உண்டல்லவா?
   
 

கூடடைதல்

பச்சை விளக்கிற்கு
காத்திருக்கும் நொடிகளிலும்
விலங்கென உருமிக் கொண்டிருக்கின்றன
வாகனங்கள்

தார்ப்பாய் போட்டு மூடப்படுகின்றன
சாலையோர கடைகள்

கிளிப்பின் வாய்திறந்து விடுவிக்கப்படுகின்றன
காய்ந்த ஆடைகள்

எல்லா வீடுகளிலும்
ஜன்னல்கள் அடைக்கப்படுகின்றன

காற்றின் திசையில்
முதுகைக் காட்டி நிற்கின்றன
மரங்கள்

மின்கம்பியிலிருந்து விடுத்து
கரைந்து பறக்கின்றன
காக்கைகள்

வெண்மேகங்கள் கூடி
கருத்து நிற்கின்றன
அந்தப் பிரதேசத்தின் மேல்


கூடடைதலின்
கனவில் நனைந்து கொண்டிருக்கின்றன
பறத்தலை மறந்த
கூண்டுப் பறவைகள்

வேட்கை

மாமிசத்தை கிழித்துண்ணும்
கூர்மையான
இளமஞ்சள் அலகுகள்

சோர்ந்து
ஆனால் மினுமினுக்கும்
கருத்து உருண்ட கண்கள்

மரக்கிளையில் கவ்விநிற்கும்
கூர்நகங்களுடைய
கருத்த கால்கள்

களைப்பின்றி
சமுத்திரம் தாண்டும்
வெள்ளை சிறகுகள்

கூண்டின் மறுமுனையிலிருந்து
என் மீதான பாய்ச்சலொன்றில்
அடர்ந்து அதிர்ந்து
ஒலிக்கின்றன
பறத்தலின் வேட்கை.

மழையும் , பாம்புகளும்

வெகு தொலைவிலிருந்து
கவனிப்பாரற்று
உமிழ்ந்து கொண்டிருக்கிறது
வெறுப்பின் விஷமேறிய
கூர் பற்களை

சலனமற்ற ஆற்றின்
மேல்பரப்பில் தவழ்ந்து
தன்னைத் தனித்து
அலையெழுப்புகிறது

கவிழ்ந்த மலையென
தடித்து அடர்ந்து கிளைவிட்ட
ஆல விழுதுகளில்
மஞ்சள் அலகை  உரசி
விளையாடிக் கொண்டிருகின்றன
சாம்பல் நிறமொத்த
பெயரற்ற பறவைகள்

வெள்ளைப்   பஞ்சுத் துண்டுகள்
ஒன்றோடொன்று மோதி
யானைக் கூட்டங்களென
திரண்டு நிற்கின்றன

காலிடறி விழுந்து
காலுதறி பிரண்டு
வேகமாய் நகரும் வரிசைக்குள்
நுழைந்து கொள்கிறது

கண்ணிர் சுரக்கும்
மழைப்  பாடலின்
கடைசி வரியின்
பிரக்ஞையற்று
மூலையில் கருத்த பிசாசின்
மடியில் சுருண்டு
பாம்புகள் பற்றிய
கனவொன்றில் உறையத் துவங்கிற்று.

பிடித்தம்

அஸ்கருக்கு
முகத்தில் பருக்கள் வந்திருக்கிறது

இப்போதெல்லாம் அவனுக்கு

செடிகள் வளர்க்கப் பிடிக்கிறது
பறவைகள் வளர்க்கப் பிடிக்கிறது
மீன்கள் வளர்க்கப் பிடிக்கிறது

கைப் பேசியில்
பாடல்கள் கேட்கப் பிடிக்கிறது

கைகளை காற்றில்
சிறகென விரித்து
சைக்கிளில் பறக்கப்  பிடிக்கிறது

வாப்பாவின் பைக்கை
யாருக்கும் தெரியாமல்
ஓட்டப்  பிடிக்கிறது

திருச்செந்தூர் பாசஞ்சரில்
சிகை பறக்க
காற்றோடு மோதும்
படிக்கட்டுப் பயணம்  பிடிக்கிறது

வீட்டில்
தனக்கென்று ஒரு அறை
வைத்துக்கொள்ளப்  பிடிக்கிறது

அதிக நேரம்
கண்ணாடி முன்னின்று
கவனமாக தனக்குப் பிடித்தமாதிரி
தலை வாரிக்கொள்ளப்  பிடிக்கிறது

எப்போதும்
கைகுட்டையோடு ஒரு சீப்பையும்
வைத்துக்கொள்ளப்  பிடிக்கிறது

கதீட்ரல் நிருத்தத்தில் இறங்கும்
எஸ்தரின் தலையிலிருந்து விழுந்துவிட்ட
ரோஜாப்  பூவும் பிடிக்கிறது.


நன்றி - உயிரோசை

குருவிகள் (மீள்பதிவு)

அறையின் சாளரம்
திறக்கும் போது
கழுத்தை சுருக்கி
பறந்து விடுகின்றன
குருவிகள் ....
எப்படி சொல்லுவது
நான் தானென்று .....

000

அறையில் யாருமற்ற
பொழுதுகளில் கண்ணாடியை பார்த்து
கொத்தி கொண்டேயிருக்கின்றன

முகச்சவரம் செய்யும் போது உடைத்து விட்டது
இரண்டு நாட்களாக காணவில்லை
கண்ணாடி ஒன்றை வாங்க வேண்டும்
குருவிகளுக்காக ...

நன்றி - உயிரோசை

உல‌க‌ சிட்டுக் குருவி தினத்தை முன்னிட்டு (20-03-2013)
http://en.wikipedia.org/wiki/World_Sparrow_Day

எழுத்து விளையாட்டு

பெட்டியில் இருந்த

ஒரு எழுத்தை

கையில் எடுத்து

"A" என்று நீட்டினான்

நஸ் ரீன் :  இல்லம்மா "V" சொல்லு

வேறொன்றை எடுத்து

"A" என்று நீட்டினான்

நஸ் ரீன் :  இல்லம்மா "I" சொல்லு

வேறொன்றை எடுத்து

"A" என்று நீட்டினான்

நஸ் ரீன் :  இல்லம்மா "B" சொல்லு

வேறொன்றை எடுத்து

"A" என்று நீட்டினான்

நஸ் ரீன் :  இல்லம்மா "G" சொல்லு

வேறொன்றை எடுத்து

"A" என்று நீட்டினான்

நஸ் ரீன் :  இல்லம்மா "O" சொல்லு

வேறொன்றை எடுத்து

"A" என்று நீட்டினான்

நஸ் ரீன் :  இல்லம்மா "R" சொல்லு

"A" எந்த நிறத்தில் இருக்கும் ?

"A" க்கு ஏதும் நிறமுண்டா ?

"A" நிச்சயமாக

      அந்த பெட்டிக்குள்

      இருக்க வேண்டுமா என்ன?

நன்றி - உயிரோசை

பீப்பாய் விளையாட்டு -2

பீப்பாயின்
வாய் பிளந்த பகுதியை

காதருகில் வைக்கிறான் 

தலை சுருக்கி

நாடி நெஞ்சையழுத்த

கன்னங்கள் மேலெழும்பி   

கண்களைச் சுருக்கி

வெள்ளை பற்கள் தெரிய

சிரிக்கிறான்

சமனிலை இழந்த நடையோடு
என் காதருகில்  வைக்கிறான்

மெல்லிய பனித்திரையில்
பெருஞ்சினங்கொண்டு

ஆர்பரிக்கிறது

நீலக்கடல்

மீண்டும்  மீண்டும்
காதருகில் வைக்கிறான்

கைதட்டிச் சிரிக்கிறான்

     

    

பீப்பாய் விளையாட்டு -1

பெரிய பீப்பாயை திறந்து 

சின்ன பீப்பாயை விடுவிக்கிறான்

ஒரு முட்டையிலிருந்து குஞ்சை
விடுவிப்பதைப் போல

பிறகு
சின்ன பீப்பாயை மீண்டும்
பெரிய பீப்பாய்க்குள் அடைக்கிறான்

குஞ்சை மீண்டும்
முட்டைக்குள் அடைப்பதைப்  போல

தோன்றுகிறது.

அபத்தம்

ஒரு நரைமயிரின் அளவு
மெல்லிய கீறல் விழுகிறது
எனது  பிரபஞ்ச விதியின் மேல்

அவள் 
தனது கைக்கடிகாரத்தை
1,12,11...

சுழற்றிக் கொண்டிருக்கிறாள்.

பீப்பாய் விளையாட்டு

கருப்பு , வெள்ளை , சிவப்பு ,பச்சையென 

வெவ்வேறு நிறங்களில்
பெரியதும் , சிறியதுமான

பீப்பாய்கள்
விளையாடக் கிடைத்தன

ஒரு வயதான மகனுக்கு.

பீப்பாய்களை 

தனித்தனியே வரிசையாக அடுக்கினான் 

பிறகு 

ஒன்றன் மீது ஒன்றாக  அடுக்கினான்

பெரிய பீப்பாய்க்குள்

சின்னதை வைத்துப் பூட்டினான்

பெரிய பீப்பாயை
சின்ன பீப்பாய்க்குள்

வைத்துப் பூட்டச்   சொன்னேன்

ஒரு அசட்டுச்  சிரிப்போடு
நிராகரித்து விட்டு
விளையாட்டைத்  தொடர்ந்தான்  

பிரஞ்னையற்ற பொழுதுகள்

அந்தக் கோடை
மிகவும் மோசமானதாக இருந்தது

எனது
நீரை முற்றிலுமாக உறிஞ்சியது

எனது
உணவுகளை களவாடியது

எனது
ஆடைகளை , கூடாரங்களை எரித்தது

எனது
தலையைப் பற்றி  இழுத்தன
இறப்பின் அருவருப்பான கைகள்

எனது
ஆன்மா உயிர்ப்பின்
பாடலொன்றை முணுமுணுத்தது

எனது
பரிசுத்தமான காதலின்
உயிர்த் துளியை
உன் மீது வீசினேன்

மழை மேகங்களைத் தந்தாய்

எனது
பிரபஞ்சத்தை
நானே உருவாக்கினேன்

நான்
மீண்டு வந்தேனா?
அல்லது
காலத்தின் கருணையா?

கவிதைகள்

0.

நமக்குப்  பிடித்தமான

ஒரு உயிரினமாக 

உருவெடுத்துக்கொள்ள முடிந்தால் 

எவ்வளவு நன்றாக இருக்கும்

குறிப்பாக 

ஒரு வண்ணத்துப்பூச்சியாக ......

0.

சமீபமாக 

முன்பிருந்ததை விடவும் 

தலைமை என்பதை 

மிகுந்த கசப்பானதாகவே 

உணர்கிறேன்.

எத்தனை குரூரம் 

எத்தனை சூழ்ச்சி 

எத்தனை வன்மை 

எத்தனை சுயநலம் 

எத்தனை பொய்

...........................................

..........................................

...........................................

ஒரு  வண்ணத்துப்பூச்சிக்கு  கூட 

துப்பாக்கியை கையாள 

கற்றுக்கொடுப்பார்கள்  போலும் .

நன்றி - உயிரோசை